4 months ago
2082-12-26
भदौ २, २०८२ सोमबार ११:२२:४५
२ भदौ, स्याङ्जा । आर्थिक वर्ष २०८२/८३ मा स्याङ्जा र कास्कीमा पैतिस सय पानीको धारा जडान गरिने भएको छ । खानेपानी तथा सरसफाई डिभिजन कार्यालय स्याङ्जाले चालु आर्थिक वर्षमा दुई जिल्लामा गरि तीन हजार पाँच सय पानीका धारा जडान गर्ने भएको हो ।
बहुवर्षीय ३४७ र नयाँ १२९ योजना सम्पन्न गर्न ३७ करोड ८९ लाख ५० बजेट विनियोजन गरिएको छ । विनियोजित बजेटबाट नयाँ र पुराना गरि कुल ४६८ योजनामध्ये ८० खानेपानी योजना सम्पन्न गर्दा उक्त संख्यामा पानीको धारा जडान गर्ने लक्ष्य राखेको कार्यालयले जनाएको छ ।
लक्ष्य अनुसार योजना निर्माण भए स्याङ्जामा एक हजार ७ सय र कास्कीमा एक हजार ८ सय गरि तीन हजार पाँच सय धारा जडान गर्न सकिने कार्यालयले जनाएको छ । कार्यालयका अनुसार चालु वर्षमा ८० योजना निर्माण हुँदा दुई जिल्लाका करिब ४ हजार घरपरिवारका झण्डै २० हजार जनसंख्या लाभान्वित हुने अनुमान गरिएको छ ।
'चालु वर्षमा ८० योजनाहरु सम्पन्न गर्ने लक्ष्य राखिएपनि बजेट अभावले अधिकांश योजनाहरु अपूर्ण हुने आशंका छ ।' कार्यालय प्रमुख हरि प्रसाद तिमिल्सिनाले भने, 'नयाँ र पुराना योजनाको संख्या धेरै हुँदा निर्माण सम्पन्न हुने योजनाको संख्या न्यून छ ।' वर्षेनी योजना थपिने तर बजेट घट्दै जाँदा बहुवर्षीयको संख्या वृद्धि हुँदा सम्पन्न हुने योजनाको संख्या घट्दै गएको उनले बताए ।
प्रदेश सरकार तर्फका पुराना २८१ र नयाँ १२९ गरि ४०२ छन् भने संघको सर्तक शिर्षकमा ६४ र विशेष अनुदानतर्फ २ वटा योजना संचालन हुनेछन् । चालु वर्षमा निर्माण सम्पन्न हुने अधिकांश योजनामा प्रदेश सरकारद्वारा संचालित योजना रहेको कार्यालयले जनाएको छ ।
गतवर्ष ४३ करोड ८६ लाख बजेटबाट तीन सय ७७ योजनामध्ये ३० वटा योजना सम्पन्न हुँदा स्याङ्जामा एक हजार ५८६ र कास्कीमा एक हजार ६७५ गरि तीन हजार २६१ पानीको धारा जडान गरिएको थियो । गतवर्ष दुबै जिल्लाका झण्डै १६ हजार जनसंख्या लाभान्वित भएका थिए । पछिल्लो तथ्याङ्क अनुसार प्रदेश सरकार बनेपछि स्याङ्जामा १६ हजार ५४० धारा जडान गरिएको छ ।
© All Rights Reserved to Water Supply and Sanitation Division Office, Syangja
Powered By: ProActive Developers