27 दिन अगाडी
2082-12-26
तस्बिर :
स्याङ्जामा खानेपानी विस्तार: एक वर्षमै ३ हजार धारा जडान
साउन २२, २०८२ बिहिबार १७:३८:५७
२२ साउन, स्याङ्जा । आर्थिक वर्ष २०८१-०८२ को एक वर्षको अवधिमा तीन हजार भन्दा बढि पानीको धारा जडान गरिएको छ । खानेपानी तथा सरसफाई डिभिजन कार्यालय स्याङ्जाले एक वर्षको अवधिमा तीन हजार भन्दा बढि पानीको धारा जडान गरेको हो ।
कार्यालयले स्याङ्जामा एक हजार ५८६ र कास्कीमा एक हजार ६७५ गरी तीन हजार २६१ पानीको धारा जडान गरेको जनाएको छ । समूह गत र एकल गरी स्याङ्जा र कास्कीमा संचालित तीन सय ७७ योजना मध्ये गएको वर्ष सम्पन्न ३० योजना अन्तर्गत उक्त धाराहरू जडान गरिएको छ ।
गतवर्ष ४३ करोड ८६ लाख बजेटबाट तीन सय ७७ योजनाहरू निर्माण गरिएको कार्यालय प्रमुख हरिप्रसाद तिमिल्सिनाले बताए । 'तीन सय ७७ मध्ये ३० वटा योजना पूर्ण रूपमा संचालनमा आएका छन् ।' उनले भने, 'स्याङ्जाका झण्डै दुई सय र कास्कीका १४५ गरी करिब तीन सय ४५ क्रमागत योजनाहरू आउँदो वर्षहरूमा सम्पन्न हुँदै जान्छन् ।'
यस अवधिमा कार्यालयले स्याङ्जाको ठूलो २६० परिवार लाभान्वित हुने चापाकोट नगरपालिका-८ को छरछरे र कास्की ठूलो ७६६ परिवार लाभान्वित हुने पोखरा महानगरपालिका-२४ को लौुरुक खोला फिल्टर ट्यांकी तीन स्टेपको लिफ्टिङ्ग खानेपानी योजना सम्पन्न गरेको जनाएको छ ।
आर्थिक वर्ष २०७५-०७६ देखि जिल्लामा झण्डै ३२ हजार पानीका धारा जडान गरिएको सरसफाई डिभिजन कार्यालयका सूचना अधिकारी कमल बरालले बताए । गण्डकी प्रदेश सरकारको 'एक घर, एक धारा' अभियानपछि ६ वर्षको अन्तरालमा ३१ हजार ७ सय ५८ पानीका धारा जडान गर्दा झण्डै १६ हजार घरपरिवार लाभान्वित भएको उनले बताए ।
प्रदेश तर्फका वहुवर्षिय योजनाहरू रकम अभावमा वर्षौंदेखि निर्माणाधीन छन् । क्रमागत तर्फका योजनालाई १० लाख र नयाँलाई २० लाख बजेट दिने गरिएको छ । मन्त्रालयले सम्पन्न गराउनुको सट्टा वर्षेनी योजना थप्दा योजना फरफारकमा समस्या भएको कार्यालयले जनाएको छ ।
त्यसैबीच कार्यालयले गएको वर्ष लिफ्टिङ्ग खानेपानी योजनालाई एक करोड ३३ लाख ६४ हजार ६५६ रुपैयाँ विद्युत महशुल अनुदान दिएको छ । स्याङ्जाका १३३ योजनालाई ८६ लाख ७८ हजार ८४ र कास्कीका ३६ योजनालाई ४६ लाख ८६ हजार ५७२ रुपैयाँ अनुदान दिएको छ । महशुलमा अनुदान दिने कार्यक्रम अन्तर्गत १६९ योजनाले अनुदान पाएका थिए ।
© सर्वाधिकार सुरक्षित खानेपानी तथा सरसफाइ डिभिजन कार्यालय, स्याङ्जा
Powered By: ProActive Developers